Þegar bensínlítirinn kostar 180 kr.

Það er mikið rætt um það hér vestra að þegar líða tekur á sumarið muni bensínverð hækka um 30% og verða 4$ á gallonið eða um 70kr. lítrinn.

Þegar það gerist mun bensín líka hækka á Íslandi, kannski ekki 30% vegna hárra skatta en hækkunin mun samt þýða mikla tekjuaukningu fyrir ríkið.

Því spyr ég, ætlar ríkið að lækka álögur á bensín ef verðið á hækkar enn frekar?  Eða ætlar ríkið að auka á vandann? Ég skil ekki þá sem vilja klína frjálshyggjstimpli á fjármálaráðherra, mér dettur ekki í hug að kalla hann frjálshyggjumann.

en yfirvofandi hækkun bensínverðs og hlut ríkisins í því á að ræða núna, ekki þegar staðið er frammi fyrir orðnum hlut.

 ---

Mér finnst það áhugavert að fylgjast með efnahagsumræðunni hér. Til að verjast niðursveiflunni ákváðu menn að endurgreiða almenningi skatta svo hjól efnahagsins snúist áfram, mesta umræðan var um hvort hækka ætti atvinnuleysisbætur, því það myndi skila sér hraðast út í efnahaginn, en menn ákváðu að hafa þetta skattaendurgreiðslu. Tékkarnir munu berast í pósti í maí.

og íslenskir stjórnmálamenn tala um verksmiðjur.

 

Verslað fyrir vestan

Búnaðarþingi til heiðurs ætla ég að setja inn lýsingar og verð á vörum sem ég kaupi og sem mér standa til boða.

 

165 kr. fyrir 225gr af Philadelphia rjómaosti. Mikið bragðbetri en sá íslenski.

925 kr fyrir kíló af Svínalund sem er "náttúrleg" það er án rotvarnaefna, hormóna osfrv. ekki með lífræna vottun en betra en "venjulega" kjötið. "Ónáttúrleg" svínalund er 780kr. kílóið.

Þá spyr maður hvernær munu íslensk stjórnvöld færa Íslendingum raunverulega kjarabót sem felst í frjálsum innflutningi á matvöru?

Bull á Búnaðarþingi

Eftir að hafa horft á fréttir Rúv á sunnudagskvöld og lesið stand-up atriði Ólafs Ragnars á Búnaðarþingi leit ég á strimil verslunarferðar gærdagsins. Nokkrir hápunktar: 

• 500 kr fyrir 2 stóra ferska kjúklinga, 4 og hálft kíló samtals eða rétt rúmar 100 kílóið.
• 400 kr fyrir kíló af grískum Feta osti.
• 780 kr. fyrir 2 kíló af soðinni skinku (partýskinku) 
• 1500 kr fyrir 3 rauðvínsflöskur,  Chianti frá Ruffino, Sangiovese frá Biagio og eina Beaujolais frá Louis Jadot  Allt einföld ódýrt hversdagsvín. 
• 170 kr fyrir 70g af ferskum Kóríander og sama fyrir ferska Basilíku, pakkningin er að mig minnir ca tvöfalt stærri en er venjulega heima.
• 325 kr fyrir 450g pakkningu af lífrænt ræktuðum konfekt tómötum sem var auðvitað alltof dýrt sérstaklega í samanburði við
• 390 kr fyrir 1,36 kg af gullfallegum plómutómötum eða 287 kr kílóið.
• Af tillitssemi við forsetann og spádóma hans um hækkandi matvælaverð segi ég ekki frá því hvað við borguðum fyrir svínakóteletturnar.

------------

Auðvitað er ekki nema hluti af þessu landbúnaðarafurðir sem framleiddar eiga sér einhverskonar hliðstæðu í íslenskum landbúnaði. 

Af öðrum vörum get ég nefnt að við keyptum kassa með 174 Pampers Cruisers (Active Fit heima í fjólubláum pakkningum) bleyjum númer 4 og borguðum 2200 kr fyrir. Það er ca. 12 kr pr bleyju.

Svo tók ég eftir að kassinn af Heineken 24 glerflöskur, kostar um 1600 kr. sem er frekar dýr bjór hérna. Maður tekur alltaf eftir bjórverðinu.

Bensínlítrinn er á ca. 55 kr. Menn segja að hann gæti farið uppundir 70 kr síðar á árinu fyrir ári var lítrinn ca. 40 kr.  Ríkið tekur ekki nema tæp 20%.

---------------- 

Hvað spádóma forsetans varðar þá er sá sem þetta ritar svo einfaldur að hugsa ef matvælaverð úti í heimi hækkar uppúr öllu valdi er þá eitthvað því til fyrirstöðu að leyfa innflutning á þessum rándýra mat? Ekki þarf íslenskur landbúnaður vernd gegn dýru útlensku dóti sem er þar að auki skrítið á bragðið og líkist gróðurhúsagrænmeti ekkert?

Það lá við að formaður bændasamtakanna vildi sjálfur drífa sig af stað og loka höfnum og flugvöllum svo hlakkaði í honum vegna yfirvofandi dómsdags. 

Að vísu hlýtur fréttin á vísi.is um að uppgötvanir vísindamanna geti komið í veg fyrir uppskerubresti í framtíðinni að vera reiðarslag fyrir Búnaðarþing. Hvernig á matvælaverð að hækka ef þessir fjárans vísindamenn leysa vandann?

Finnum fordóma Sóleyjar

Sóley Tómasdóttir, fordómaspúandi femínistinn náði í fyrradag að opinbera sig enn einu sinni.

Með nokkrum setningum tókst henni að varpa ljósi á eigin fordóma og vanþekkingu á alþjóðamálum. I bloggi sem hún nefnir "Áhrif rótanna" segir hún:

Eða er hægt að segja að Obama sé hryðjuverkamaður vegna tengsla sinna við Kenýa? -Af því hann hefur farið í föt sem hugsanlega svipar til klæðnaðar Osama bin Laden? -Sem kemur frá Afganistan muniði?

Djöfull er Kaninn klikkaður!

Lokasetning hennar opinberar fordóma hennar til þjóðarinnar sem er að gera sig líklega til að kjósa þennan hálf kenýska mann sem forseta. Við því er bara hægt að segja: Djöfull er Sóley klikkuð!

Um skipan dómara

Spegillinn í dag kemst að merkilegri niðurstöðu í umfjöllun sinni um skipan dómara. Þar var kynnt ítrekað að vandinn við skipan dómara er ekki aðferðin heldur ráðherrann. Að orðið hafi trúnaðarbrestur milli ráðherra og lögmannastéttarinnar vegna umdeildra skipanna dómsmálaráðherra.

Daginn fyrir kosningarnar í fyrra skrifaði ég pistil um umdeildar embættisveitingar dómsmálaráðherra. Þar kom fram að embættisveitingar dómsmálaráðherra hafa alls ekki verið umdeildar, utan einnar.

Málið er að lögmannastéttina svíður að fá ekki að ráða. Svo einfalt er það, í raun kom Hrafn Bragason  upp um sig með athugasemdum sínum. Hann sagði ef ráðherra færi alltaf að vilja hæstaréttar væri ekkert vandamál. 

Ef við fáum að ráða þá verðum við ánægð annars förum við í fýlu.

Það mætti halda að Hrafn sé genginn í barndóm, þegar maður hlustar á þessi leikskólarök.

Svo rímar það ekki alveg að gagnrýna að sjálfstæðismenn hafi skipað alla dómara og því séu pólitísk áhrif þeirra svo mikil, en um leið benda á þessa sömu óánægðu dómara sem fagaðila sem verði að hlusta á.  Annaðhvort er þetta óalandi pólitískt skipað lið eða fagaðilar og réttmætar skipanir. Það verður ekki bæði haldið og sleppt.

Rógsherferð hlutdrægra einstaklinga

Jóhannes Jónsson  birti í Morgunblaðinu í dag grein þar sem hann leggur enn einu sinni af stað í stríð við fulltrúa almennings sem láta ekki að stjórn hans. Nú er það bæjarstjórnin á Seltjarnarnesi sem vill ekki bukta sig og beygja fyrir mikilmenninu.

Greinin er reyndar ekki merkileg nema fyrir eitt, í umfjöllun um að íbúar Seltjarnarness hafi hafnað landfyllingu er að finna setninguna:

"Þá er ekki loku fyrir það skotið að rógsherferð hlutdrægra einstaklinga – sem ráðist var í fyrir umræddar kosningar "

Hmm, hvar hef ég séð rógsherferð rétt fyrir kosningar...  Minnir þetta ekki aðeins á grjótkast úr glerhúsi.

 

 Lykillinn að málinu liggur hins vegar í þessari setningu:

Bæjaryfirvöld buðu Högum á sínum tíma að kaupa á markaðsverði land undir verslun fyrir Bónus á Hrólfsskálamel. Eins og Íslendingar vita eru verslanir Bónuss þannig reknar að álagningu og allri umgjörð er haldið í algjöru lágmarki og augljóst að verslunin myndi aldrei standa undir slíkri  fjárfestingu á þeim eftirsótta og dýra stað.

Kvörtun Jóhannesar er semsagt sú að þeim bauðst að kaupa land á verði sem aðrir hefðu borgað en það þóknast honum ekki.

Hvers vegna eiga Seltirningar að niðurgreiða fyrir hann landið? Er það ekki fjandi mikil tilætlunarsemi?

Er þetta í raun ekki dæmigert fyrir Jóa í Bónus, honum finnst það eðlilegt að aðrir beri kostnað af hans viðskiptum og hagnaði

Framtíðin er frá Japan

Fjölskyldan fór inn til DC sl. sunnudag til að líta á Japanssýningu í Kennedy Center. sýningin var skemmtileg og þar voru róbotar frá Honda og Toyota til sýnis. Vélmenni Honda, Asimo var magnað þar sem það hljóp, labbaði upp og niður tröppur og lék allskyns listir.

Ég varð fyrir n.k. hugljómun þar sem ég hélt á Karitas svo hún gæti séð. Hún starði í andagt á vélmennið, ég horfði á hana. Hvernig verður heimur hennar eftir 33 ár? Hún er þegar orðin nokkuð tölvulæs og horfir á vélmenni athafna sig 4 ára. Þegar ég var 4 ára þekktust einkatölvur ekki, Rúv var í svarthvítu og beinar útsendingar voru færri skynsamar ákvarðanir fyrrverandi borgarstjóra. 

Eftir þessi 33 ár þegar ég verð orðið löggilt gamalmenni og Karitas komin á minn aldur, munu vélmenni sækja lyfin mín og passa að ég gleymi ekki að taka þau? Mun ég þurfa að forrita það til að blanda fyrir mig almennilegan Martini? Mun einhver ábyrgur fjölskyldumeðlimur geta yfirskrifað mínar skipanir til að bjarga lifrinni?

Miðað við þróun í tölvum og tækjum síðustu ár, er ekkert ólíklegt að rafknúnir aðstoðarmenn hjálpi fólki í náinni framtíð. Magnað. 

 

Karitas eignas vin. Fleiri myndir hér.

 

 

Þetta er svo hann Asimo

 

Enn skjóta þeir hér í Ameríku

Það er erfitt að lesa um morðin í NIU í gær. Fyrir mörgum árum var ég skiptinemi í næsta bæ og sótti mikið til DeKalb. Fjölskyldufaðirinn vann á fjármálaskrifstofu skólans, ég átti kærustu sem var í DeKalb High og síðar fóru tveir að bestu vinum mínum í NIU. Ég man ekki eftir Cole Hall en við vorum alltaf að þvælast þarna á Campus því þar voru tónleikar og partý sem allt var auðvitað spennandi fyrir high school krakka.

 

Vegna þessa árs sem ég var þarna les ég Chicago blöðin stundum og held með öllum Chicago íþróttaliðunum.  Ég hef enn samband við fólk á svæðinu, engin þeirra var nálægt árásinni.

Þetta er svæði sem ég þekki vel, ég get ekki lýst hvað mér finnst þetta furðulegt. DeKalb er friðsamur rólegur bær, lítið um glæpi, eiginlega sveitalegur. 

Samsæriskenningar íhaldz

Bjarni Kjartansson sem kallar sig miðbæjaríhald og fer mikinn hér í athugasemdum hér á moggabloginu hefur sett fram áhugaverða samsæriskenningu.

Nú skal taka það fram að Miðbæjaríhaldið er enginn venjulegur sjálfstæðismaður, hann hefur uppáskrift frá Bjarna Benediktssyni (fyrrv. forsætisráðherra og form. flokksins) um pólitískan þroska. Hann hefur sopið marga póltíska fjöruna og þekkir flokkinn og sögu hans vel.

Í athugasemdum við skrif Óla Björns Kárasonar um blaðamannafundinn heldur Bjarni því fram að starfsmenn sjálfstæðisflokksins hafi viljandi klúðrað blaðamannafundinum.

Athugasemd Miðbæjaríhaldsins byrjar svona:

Óli, það getur einfaldlega EKKI verið, að menn hafi verið svona illa undirbúnir hvað varðar umgjörð fundarins.

Svo heldur hann áfram:

Hver er sá snjalli maður, sem boðar blaðamannafund um kl 13, þegar fundur borgarfulltrúa hefst kl 12,30 um alvarlega stöðu og hvernig beri að snúa við pr-inu, sem er algerlega við ALkul um þessar mundir?

Nei  okkar menn KUNNA ÞETTA ALLT MIKLU BETUR en einhverjir ákváðu að GERA EKKI BETUR.

Eins og allir vita þá er það fyrst og fremst 3 aðilar sem eiga að bera ábyrgð á fundum sem þessum. Þau eru:

• Andri Óttarsson, framkvæmdastjóri flokksins
• Kristín Hrefna Halldórsdóttir framkvæmdastjóri borgarstjórnarflokksins
• Jón "Ég hætti aldrei að vera aðstoðarmaður Vilhjálms" Kristinn Snæhólm.

Ég veit ekki hvort eitthvert eitt þeirra á að hafa svikið Vilhjálm eða þau öll.  Ég trúi kenningu Bjarna tæplega, en áður en ég yfirgaf landið minnist ég þess ekki að hafa orðið vitni að því að Bjarna hafi vantað á samkomu sjálfstæðismanna í Reykjavík.

 

Nú er nóg komið...

Farsinn í borginni er fyrir löngu kominn út fyrir allan þjófabálk. Blaðamannafundurinn í Valhöll var óskiljanlegur skrípaleikur. Einhver þarf að segja Vilhjálmi að það er ekki nóg að sitja undir málverkinu af Bjarna Benediktssyni til að vera leiðtogi og borgarstjóri. Einhver þarf að segja starfsmönnum Sjálfstæðisflokksins að þessi framkoma við fjölmiðlana er í besta falli viðvaningsleg og í versta falli skemmandi fyrir orðspor og málstað flokksins.

Svo er komið nóg af hringingum ofan úr Vegmúla í Reyni Traustason. Fyrst lak þaðan nafn Guðfinnu Bjarnadóttur sem borgarstjóraefni eins og Hjörtur Guðmundsson hefur sýnt fram á. Nú hef ég ekkert út á Guðfinnu að setja, en henni og Sjálfstæðisflokknum yrði enginn greiði gerður með því að kalla inn umboðslausan borgarstjóra. Það var ástæða og tilgangur með prófkjöri, við völdum lista. Hanna Birna var ekki bara í öðru sæti heldur fékk hún langflest atkvæði allra, hún fékk fleiri atkvæði en Vilhjálmur og Gísli í heildina og hún fékk tvöfalt fleiri atkvæði í annað sætið en Júlíus Vífill. 85% kjósenda í prófkjörinu greiddu Hönnu atkvæði og tæplega 6 af tíu settu hana í annað sætið. Að ganga framhjá henni væri að ganga framhjá vilja sjálfstæðismanna.

Nýjasta sendingin sem svo lekur ofan úr úr ráðuneyti heilbrigðis er dæmalaus árás á varaformann flokksins á DV.is. Ég er algjörlega hættur að skilja hvað þetta fólk er að hugsa.

Einn af mörgum kostum varaformannsins er sá að hún hefur verið hafin yfir þessa svokölluðu arma, hún sótti stuðning yfir allan flokkinn, um allt land. Ef þessir armar mótast á afstöðu manna til slagsins um 2. sætið í Reykjavík haustið 2006, þá var það þó þannig að í hennar nánasta stuðningshóp var fólk sem síðar studdi Guðlaug og fólk sem studdi Björn. Þorgerður er ekki hluti af þeim átökum.  Að draga hana svo inn í pólitískt harakiri fyrrverandi borgarstjóra er smekklaust og óþolandi.

Það er eins og menn hafi áttað sig á því að holan sem þeir voru að grafa var orðin of djúp til að þeir kæmust uppúr henni. Því reyna þeir að draga aðra niður í hana til sín. 

Er það markmið þessa fólks að skemma flokkinn? Trúir það því að þau geti sabóterað flokkinn mánuðum eða árum saman og látið svo eins og ekkert sé?

Hvaðan gott kemur og hvaðan vont kemur, er geymt en ekki gleymt...