Lína net plús?

Ég rakst á frétt í síðustu viku sem vakti mig til enn og aftur til umhugsunar um Orkuveituna.

Fréttin segir frá því að stjórn Orkuveitunnar að rekstur gagnaveitu fyrirtækisins verði í sérstöku félagi í eigu OR. Er verið að endurvekja Línu net? Er Lína net plús (eins og Dagur myndi nefna fyrirtækið) að verða til?

Aðskilnaðurinn er mjög jákvæður ef selja á Gagnaveituna en mér finnst þessi aðgerð vera frekar vísbending um að OR verði því miður ekki einkavædd. Með því að einangra þennan rekstur sem er í samkeppnisumhverfi og færa hann útúr fyrirtækinu er verið að reyna að minnka þrýsting á að OR verði selt. Ég trúi því ekki að hægrimenn eins og Gulli og aðrir fulltrúar Sjálfstæðisflokksins stefni ekki að sölu OR, þeir hljóta að vera að gefa eftir til Framsóknar.

Það vekur mig svo aftur til umhugsunar til hvers við vorum að berjast við að ná borginni, þegar við leyfum framsóknarmönnum að stjórna OR? 

 

Ekki góð könnun fyrir neinn nema Frjálslynda

Við skulum vona að hreyfing á fylgi frá nóvember fram að kosningum verði ekki eins og fyrir fjórum árum 

	gallup nóvember 2002	kosningar 2003	Gallup nóvember 2006	Ef fylgi hreyfist eins fram að kosningum	Þá verður þetta fjöldi þingmanna:
Framsókn	14%	18%	8%	12%	8
Sjálfstæðisflokkur	41%	34%	37%	30%	19
Frjálslyndir	2%	7%	11%	16%	10
Samfylking	32%	31%	25%	24%	15
Vinstri-gænir	11%	9%	19%	17%	11

Semsagt Kaffibandalagið í ríkisstjórn og Frjálslyndir í dómsmálaráðuneytinu. Það yrði gæfulegt.  Ég held reyndar að eitthvað meirihátta þyrfti að koma til svo Sjálfstæðisflokkurinn færi svona langt niður. En maður skyldi aldrei segja aldrei.  Það er alveg ljóst að ef fylgi flokksins er í þessum lægðum í könnunum í aðdraganda kosninga, þá er eitthvað mikið að. Kannski er könnunin núna "tæknileg mistök"? Kannski eru frjálslyndir að snerta einhverja strengi hjá kjósendum?

Reyndar þyrftu frjálslyndir að bæta mannvalið allverulega og ég held hvorki að Jón Magnússon sé lausnin né þeir fái alvöru fólk í framboð. Framboðslistar Frjálslyndra næsta vor verða líklega þéttskipaðir lukkuriddurum sem hafa ekki náð þeim frama í öðrum flokkum sem þeim þótti þeir eiga skilið. Svona fólk af kaliberi fyrrverandi dómsmálaráðherra Óla Þ. Guðbjartssonar. 

Þegar ég byrjaði í dómsmálaráðuneytinu fyrir rúmum 4 árum spurðist ég fyrir um málverkasafn sem Óli lét kaupa af listmálara frá Selfossi, málverkin voru keypt fyrir sýslumanninn á Selfossi að honum forspurðum og mig minnti að eftirmálar hafi orðið þeir að þau voru send í ráðuneytið því sýslumaður vildi ekkert með listina hafa. Þetta var auðvitað skandall og misnotkun á almannafé, Óli var að gera einhverjum félaga á Selfossi greiða og keypti af honum malverkasafn sem enginn vildi eiga.

Ég reyndi mikið að finna eitt af þessum málverkum til að fá inn á skrifstofu mína, ekkert fannst. Málverkin hljóta að hafa farið til Selfoss aftur, en ég hef ekki spurt núverandi sýslumann hvort hann lúri á þeim. Þannig á veggnum mínum hafa hangið ljósmyndir eftir betri helminginn en ekki sögulegar pólitískar minjar eins og ég vonaði. Nú er líklega fullseint að gera eitthvað í málunum.

Kaffibandalagsríkisstjórn yrði reyndar ekki ósvipuð þriðja ráðuneyti Steingríms Hermannsonar.  Í stað Jim Beam, Sólness, Grísins og Óla Þ. fengjum við Ágúst 800, Magnús bombardier,  Hegranesgoða og Ömma efnahagsundur. Það yrði aldeilis hressandi partý.

Fylgi Frjálslynda flokksins eykst

Fögnum skattalækkunum en...

Hvers vegna þarf blessað fjármálaráðuneytið alltaf að hegða sér eins og asnar þegar kemur að áfengismálum?

Ferðaþjónustan kvartar yfir háu verði á áfengi og þegar tækifæri er að leyfa því að lækka með þessum fyrirmyndar skattalækkunum þá þarf fjármálaráðuneytið endilega að hækka áfengisgjaldið á móti.

Það er allt gott við þessar lækkarnir en hvernsvegna þarf að varpa skugga á þær með þessum aðgerðum? Þetta minnir mig á eina aumustu stund Alþingis þegar frumvarp  um gjald af áfengi og tóbaki var lagt fram og tekið til 1. umræðu kl 18.08 vísað til nefndar kl. 18.53 tekið til 2. umræðu 20.58 og samþykkt sem breyting á lögum kl. 21.52. 

Flutningsmaður sagði í ræðu sinni

efni málsins er þannig að það þarf að hafa hraðar hendur við að afgreiða það í þingsölum eins og allir þingmenn þekkja.

Hækkunin nam 7% sem var um 100kr á flösku af sterku áfengi en ekki var hreyft við veikari drykkjum.  Þingheimur sem allur tók þátt í þessari dellu var sannfærður um að fólk myndi streyma í Ríkið og hamstra vodka vegna 100 kr. hækkunar!

Þetta var árið 2004 en ekki 1950, það eru svona vinnubrögð sem eru þingmönnum til minnkunar, ég trúi því að Ögmundur sé sannfærður um það þurfi að hafa vit fyrir almenningi með þessum hætti en þegar sjálftæðismenn standa að svona rugli þá örvæntir maður. Vinnubrögðin eru þinginu til minnkunar því ekkert tækifæri er gefið til eðlilegrar umræðu um málið.

 

Stjórnmál eru ekki flókin, ef þú segist ætla að lækka skatta og stattu þá við orð þín, lækkaðu skatta og feldu ekki einhverjar smá hækkanir inni í málunum til að varpa skugga á þau. Stjórnmál snúast að stærstum hluta til um það að standa við orð sín, stór og smá. 

 

Árni fær annars risastóran plús í kladdann að fyrir að lækka virðisaukaskatt af þjónustu veikingahúsa úr 24,5% í 7%. Ég trúi að þetta geti orðið til að verða mikil lyftistöng fyrir veitinga- og kaffíhús og ekki verður vanþörf á eftir aðför heibrigðismafíunnar að þeim.

 

Frumvarp um lækkun virðisaukaskatts á matvörum lagt fram

nýkratar, semíkommar, kommar

Mér hefur stundum verið legið á hálsi fyrir að einfalda hlutina og kalla vinstri menn það sem þeir eru, nemlig komma.

Þess vegna er alltaf gaman að því þegar menn gangast við eðli sínu, þótt óafvitandi sé.

Nýlega var stofnað blog "nýkrata" hér á blog.is, þau sem þar skrifa eiga það til að hafa rétt fyrir sér, eins og nýleg færsla ber með sér. Sannleikurinn er auðvitað, að þau eru alþjóðasinnaðir kommúnistar og sem slíkir eiga þau það til að hitta á mál sem eru neytendavæn.

Þegar maður skoðar síðuna þá er áberandi heljarinnar tenglalisti yfir bræðrafélög semíkomma um heim allann. Þegar vinir "nýkratana" eru skoðaðir hittir maður fyrir, semíkomma frá Rúmeníu, flokk Ion Iliescu. Iliescu sætir nú ákærðu fyrir glæpi gegn mannkyni og er af mjög mörgum talinn bara gamaldags austantjaldskommúnistaeinræðisherra. En þetta er vinur "nýkrata".

Við rekumst líka á ungverska sósíalistaflokkinn sem er að hluta arftaki ungverska kommúnistaflokksins en þau "nýkratarnir" eru væntanlega enn að halda upp á 50 ára afmæli innrásar sovétmanna í  Ungverjaland, þar féllu ríflega 3000 manns.

Leiðrétt: Enganr saþykktar tölur eru til um hve margir féllu, en um 200 þús. manns flúðu landið og áætluð tala látinna er frá rúmlega 3000 til rúmlega 30.000. í skýrslu Sameinuðu þjóðanna( UN General Assembly Special Committee on the Problem of Hungary (1957) Chapter V footnote 8PDF) er sagt frá tölunni 32 þúsund en sú tala sögð líklega of há.

Króatíski jafnaðarmannaflokkurinn er sprottinn úr króatíska kommúnistaflokknum, en frægasti króatíski kommúnistinn er auðvitað Tító og þótt kommúnistum í gamla daga hafi fundist Tító kúl vegna uppreisnar sinnar gegn yfirgangi Sovétmanna, þá var hann samt einræðisherra í 47 ár.

Ofantalið eru random dæmi af lista "nýkratanna" og örugglega mun fleiri og ógeðfelldari samtök í tenglalista "nýkrata".  En þau kippa sér öruggleg ekki mikið upp við að vera kennd við gamla einræðisherra og arftaka þeirra, þeim þykir örugglega sárara að vera í félagi með Amir Peretz leiðtoga ísraelska verkemannaflokksins og varnarmálaráðherra Ísrael, en hann stýrði innrásinni í Gaza.  Verkamannaflokkurinn ísraelski er ásamt Samfylkingunni og 3 öðrum stjórnmálaflokkum áheyrnarfulltrúi að sambandi semíkomma í Evrópu.

Hvernig mundi hæstvirtur 9. þingmaður Reykjavíkurkjördæmis norður taka á móti kollega sínum og skoðanabróður frá Ísrael?  

 

 

Gott hjá Gulla Þór...

og Ágústi Ólafi, Birgi Ármanns, Bjarna Ben, Sigga Kára, Arnbjörgu Sveins, Pétri Blöndal, Birki J., Einar Má Sigurðarsyni, Kötu Júl, Gunnu Ögmunds, Gunnari Örlygs, Ástu Möller og Sigurrós Þorgrímsdóttur.

Þau eru búin að leggja fram frumvarp um breytingu ýmissa lagaákvæða sem varða sölu áfengis og tóbaks.

Málið er gríðarlega jákvætt og það er í raun fáránlegt að við búum við það ástand sem er að þessi almenna neysluvara sé eingöngu seld í sérstökum búðum. Eitt af mörgu sem ég skil ekki er að af hverju það megi vera með vínbúð á bensínstöð í Hveragerði en ekki í matvöruverslun í Reykjavík. 

Það er svo margt vitlaust við núverandi fyrirkomulag.

Við skulum vona að betur fari fyrir þessu frumvarpi en fyrri frumvörpum um sama efni. Í greinargerð með frumvarpinu segir: Mál þetta var lagt fram á 130., 131. og 132. löggjafarþingi en hlaut ekki afgreiðslu. Á 132. þingi komst frumvarpið ekki í fyrstu umræðu, árið áður náði það í gegnum 1. umræðu en ekki lengra og ári fyrr náði það ekki einu sinni í fyrstu umræðu.

Árið 2001 var lagt fram svipað frumvarp af Vilhjálmi Egilssyni og fleirum, þeir sem helst stóðu upp til að andmæla þá voru Ögmundur Jónasson(suprise, suprise) og Mörður Árnason. Í þeim umræðum lét Mörður þessi ummæli falla:

Hvar er frelsi einstaklingsins til þess að reykja hass? Er það eitthvað ómerkilegra frelsi en frelsi einstaklingsins til þess að kaupa og drekka áfengi?

Aðrir sem mótmæltu frumvarpinu voru þeir Steingrímur Joð og Karl V. Matthíasson. Sá síðarnefndi er á mögulega á leið inn á þing aftur næsta vor og því er mikilvægt að klára málið núna áður en vitleysingar eins og hann komast aftur á þing. 

Fjórtán þingmenn úr 3 flokkum leggja frumvarpið fram, því til viðbótar má nefna að Þorgerður Katrín var einn meðflutningsmanna frumvarps Vilhjálms Egilssonar.  Þannig má telja að amk.fjórðungur þingheims styðji frumvarpið.

Eins má telja til að stærstur hluti þingflokks Sjálfstæðisflokksins styðji frumvarpið. Einnig er líklegt að nokkuð margir þingmanna Samfylkingarinnar styðji málið, fyrir utan kannski hana sem stýrir flokknum, það er nánast öruggt að hún muni taka forsjárhyggjuafstöðu í málinu, hún gerir það alltaf þegar hún á val.

Þótt staðan á þingi er líklega góð er hinsvegar er ástæða til að örvænta um því telja má á fingrum annarrar handar þingmannafrumvörp sem ná því að vera samþykkt.  Á 131. þingi (veturinn 2004-2005) var ekki eitt þingmannafrumvarp samþykkt. Öll frumvörp að veitingu ríkisborgararéttar undanskildum, sem urðu að lögum þann veturinn komu frá ríkisstjórninni! Það er varla von að talað sé um ósjálfstæði löggjafans gagnvart framkvæmdavaldinu.

Þess vegna er mikilvægt fyrir alla sem hafa áhuga á málinu og finnst það asnalegt að eingöngu bíleigendur geti verslað vín eftir kl. 18, finnst það asnalegt að eingöngu á landsbyggðinni megi reka vínbúð með annarri verslun og finnst ríkisskömmtun á víni og víntegundum skammarlegt að taka til máls í málinu. Lesandi, sendu þingmanni í þínu kjördæmi póst og segðu honum að þú viljir að þetta frumvarp nái fram að ganga.

Netföng og símanúmer þingmanna

Kæri ______

Ég treysti á þig til að veita  frumvarpi Guðlaugs Þórs Þórðarsonar ofl. þingmál nr. 26, um breytingu ýmissa lagaákvæða sem varða sölu áfengis og tóbaks, brautargengi á  yfirstandandi þingi.

Styðjir þú frumvarpið og það verði til breytinga á lögum aukast líkur á að þú fáir mitt atkvæði næsta vor.

Ég fylgist með þér. 

Kær kveðja

__________