Minnisleki Jónasar

Hún er ekki merkileg bókin hans Jónasar Kristjánssonar ef minni hans er með þessum hætti:

“Við Magnús Óskarsson gáfum Birgi Ísleifi Gunnarssyni borgarstjóra ráð fyrir sveitarstjórnarkosningarnar 1982. Vildum, að Birgir yrði grænn borgarstjóri. Legði græna trefla um borgina, til dæmis milli Elliðaárdals og Laugardals. Slíkt var þá ekki enn komið í tízku. Hittum Birgi, sem virtist vera alveg mállaus og skoðanalaus. Ég hef aldrei hitt pólitíkus, sem kom eins aulalega fyrir og Birgir. Það var eins og hann væri í öðrum heimi og heyrði ekki orð manna í umhverfinu. Mér kom ekki á óvart, að hann féll í kosningunum. Hann fór ekki eftir neinu, sem við Magnús ráðlögðum honum.
(Úr bókinni: Jónas Kristjánsson: Frjáls og Óháður, 2009)”

Það er ekki von að Birgir hafi ekki farið eftir neinu sem þeir Jónas og Magnús ráðlögðu honum fyrir sveitarstjórnarkosningarnar 1982, hann var ekki í framboði, það var annar maður.

Miðað við lýsinguna þá heldur maður helst að Jónas hafi verið að tala við brjóstmyndina af borgarstjóranum fyrrverandi.

Athugasemdir

[Ragnar Gunnlaugsson, 21.12.2009 kl. 13:41]

Bók sem ég mundi aldrei nenna að lesa. eftir þennan dæmalausa ruglukoll. 

[Ómar Ragnarsson, 21.12.2009 kl. 22:58]

Jónas á auðvitað við kosningarnar 1978.

Birgir hafði verið fyrsti græni borgarstjórinn árin á undan þegar hann gekkst fyrir átaki við að hreinsa sjóinn báðum megin á nesinu með því að koma upp miklum hreinsistöðvum.

Ég man það vel hvað þetta gaf gott tækifæri til þess að gera grín að þessu með því að segja að loksins yrði drullast til að gera þetta svo að bátarnir hættu að sigla í hægðum sínum út Sundin brún. Öllum væri hins vegar skítsama og vart væri hættandi á að bjóða Birgi í sleif sýnishorn af sjónum.

Gerði síðan heilan brag um þetta sem ég kallaði Skítabraginn og var burðarás skemmtiprógrammsins lengi vetrar.

Birgir hafði ekkert upp úr þessu skítamáli nema vesen og að því leyti skiljanlegt að hann hefði fælst frá grænum málum.